كيف تعرف المصرى؟؟؟؟؟؟؟؟

كيف تعرف المصري؟
الحلقة الأولى
:المصري هو اللّي

بيفهم في الطب ويشخص المرض ويوصفلك الدوا وبيفهم في النقاشة والكهربا
وتصليح العربيات والطبيخ والسياسة والكورة وهو أبيض ياورد

بيحط الريموت كونترول في كيس بلاستيك كعادة فرعونية

يقف يتكلم على الباب نص ساعة بعد إنتهاء الزيارة والسلام

لمّا تفتح نملية المطبخ هتلاقي عنده عشرين برطمان بتاع مربى فاضي
بقالهم سنين ومازال مُصِر على جمع المزيد

ييجي بعد معاده بساعتين ويفتكر إن ده عادي

لسه عنده إصرار إنه يتكلم بصوت عالي في التليفون لما تكون المكالمة
دولية عشان التاني يسمعه

بيعتبر نفسه أفضل واحد في الشرا والفصال وبعد كده يكتشف إن الحاجة في
المحل اللي جنبه أرخص من غير فصال

بيحتفظ بأكياس محلات اللبس والأحذية وورق الهدايا تحت مرتبة السرير
لسنوات ومابيستخدمهاش

عنده صينية مكسرات متقسمة لتلات او أربع أقسام لزوم المزاج وعمره
ماإستخدمها

ممكن يعدي التلاتين ولسه عايش مع أمه وأبوه وماعندهومش مشكلة

بيشتري قبل الفطار في رمضان مواد إستهلاكية أصلا موجود عنده في البيت
لسه ماستخدمهاش

بيكون عنده شواية لزوم الرحلات أقصى استخدام لها كان مرة واحدة في
العيد

بيشيل طابع البريد من على الظرف لو الختم ماكانش عليه

بيفتكر إن أي حد بيشتغل في الخليج بيغرف فلوس من غير حساب

بيكون مشغول بقيمة التيبس أو البقشيش طول العشا ياترى ربع جنيه ولا نص
جنيه

برده بيتخانق ساعة دفع الحساب بحرارة شديدة على إنه هو اللي لازم يدفع

بيفرش ملاية سرير على طقم الأنتريه عشان يفضل نضيف لما ييجي ضيوف
ومابيشيلهاش لما ييجوا

والأهم إنه اللي بيحب يسخر من نفسه ومن بلده وحكامه بس مايطيقش حد
تاني يسخر منهم ، وساعتها بيفرش له الملايه

الحلقة الثانية

المصري هو اللي لو عمل حاجة حلوة يبعت لجاره طبق يدوقه

وهو اللي لو لقى الدنيا بتشتّي يجري يخبّط عليك يقولك لمّ الغسيل

وهو اللي لو شم عندك حاجة بتتحرق يجري يطمن عليك لا تكون اتخنقت

وهو اللي لو سمع صوت زعيق وخناق عندك يجي يصلح

وهو اللي لو لقى خناقة في الشارع يقف يحوش مش بس يتفرّج

وهو اللي لو لقى حد بيغرق يجري ينط في الميه حتى لو هيغرق معاه

وهو اللي لو اتفرط منك كيس الجوافة في الشارع يقف يلمّ معاك

**********

المصري هو اللي لو حس انك مزنوق يعملك جمعية مخصوص و يقبّضك الأول

و هو اللي يقف معاك في الأحزان و الأفراح زي مايكون من بقية اهلك

و هو اللي يلمّلك من الركاب فلوس لو مرتبك اتسرق منك في الأتوبيس رغم انه مايعرفكش

و هو اللي لو لقاك في مواصلة و كان عارفك يحلف ميت يمين ليدفعلك الأجرة

حتى لو مافيش في جيبه غير نص جنيه

**********
المصري هو اللي يقعد معاك ع الفطار في رمضان

المصري اللي يشتري بالونات لولادك في العيد

المصري اللي يقف جنبك وانت بتدبح الاضحية

المصري اللي يباركلك لما ابنك يجيب مجموع ويساعدك يجيبله شغلانة

المصري اللي ييجي يقولك تجيب كشاكيل و أقلام بالجملة عشان توفر المصاريف

**********

المصري هو العروبة فاتح ازرعه لكل العرب
المصري شايل همومه وصابر ويفكر في هموم غيره
المصري بني الهرم واعطي للعالم درس في الصبر والجلد
المصري أبو قلب طيب اللي دموعه في الفرح والحزن سبقاه
المصري طول عمره حمال الاسيه ولا عمره قال الاه
ولو لم اكن مصريا لوددت ان أكون مصريا

طيبة المصري مش ممكن تلاقي زيّها فى اي بلد تانية

الحلقة الثالثة
تعرف المصرى من مهنته طبعآ

يعنى السواق المصرى هو اللى لما البنزين يزيد 25 قرش فى اللتر يزود هو 50 قرش على كل راكب
وهو كمان اللى يركبك الصبح و الدنيا هاديه ب 50قرش و يركبك الساعه 2 عصرى ب 100 قرش
وهو كمان اللى يفضل يقول الأجره ناقصه ولما يكون عندك ليه باقى يطنش

2- الطبيب المصرى هو اللى تشوفه فى المستشفى الحكومى مكشر و منكوش ولابس شبشب وتشوفه بالليل فى المستشفى الخاص لابس البالطو و مسرح سعره وناقص يقوم يبوسك
وهو كمان اللى ممكن يخليك تعمل تحاليل ملهاش لازمه لمجرد أن مراته صاحبه معمل التحاليل
وهو كمان اللى ممكن بعد كام عمليه تجمع من وراه فى بطنك فوط تكفى جهاز بنتك

3-المدرس المصرى هو أكيد اللى ممكن يرجعلك ابنك ميت لأنه كان بيتدرب عليه كراتيه
وهو اللى ممكن تلاقيه طارد نص الفصل بره علشان يفضى الفصل علشان ميعاد الدرس
وهو كمان اللى معه خط سير كل طالب فى المدرسه,بياخد درس عند مين و أمتى

4-المهندس المصرى
هو اللى بيكون شايف ان وجود سيخين حديد بس كافى لأقامه عماره 15 دور
وهو اللى اكتشف أن الأسمنت من الكماليات فى عمليه البناء
وهو اللى أكتشف خلطه الأسفلت اللى لازم تتغير كل اسبوع

5-مدير البنك المصرى
هو اللى أكيد عارف مين من رجال العمال ناوى يهرب و هيهرب على فين,ودا فقط للتوزيع العادل لفلوس البنك على رجال العمال الهاربين

6- رجل الأعمال المصرى
معلش هم مش هنا دلوقتى ,لما يرجعوا من سويسرا نبقى نتكلم

7-الموظف المصرى
هو أكثر الشخصيات تشجيعآ للرياضه و الذى يرى أن طلوعك و نزولك السلم 67 مره فى اليوم هى طريقك نحو حياه افضل
و هو فرضو من أكثر الشخصيات أجتماعيه وعلشان كده بيستمتع أنه يشوفك كل يوم
وفوت علينا بكره

كيف تعرف المصرى؟؟؟؟؟؟؟؟ Answershn0ol0uv0

كيف تعرف المصرى؟؟؟؟؟؟؟؟ Answershn0ol0uv0

» هل تعرف من هو فالانتين!!!!!
» لو عايز تعرف انت عاقل ولا مجنون ادخل و شوف
» انا عرفت هبقى ازاى سعيد تحب تعرف انت كمان
» تعرف تنحت وردة عل بطيخة خش واتعلم خطوة خطوة